عرب CMS منصة تعليم ووردبريس بالعربي، مش مترجمة عن محتوى أجنبي، معمولة من الأول للي بيشتغل بالعربي: فريلانسر بيبني مواقع لعملاء، أو صاحب مشروع صغير عايز موقعه يبقى في إيده.
ليه JetEngine وElementor؟
لأن دي الأدوات اللي بتخليك تبني مواقع ديناميكية حقيقية — دليل شركات، منصة عقارات، موقع وظائف — من غير ما تكتب كود. أغلب الشروحات العربية بتقف عند «ازاي تعمل صفحة»، إحنا بنكمّل لحد «ازاي تبني نظام». عرب CMS القناة العربية الوحيدة اللي بتغطي منظومة Crocoblock بعمق.
هتلاقي إيه هنا؟
- الأكاديمية: مسارات تعليمية، كل درس وراه كويز، وكل كويز بيديك قطع بازل. لما تجمع القطع بتفتح شهادة باسمك ليها كود تحقق عام.
- المقالات: شروحات ومراجعات أدوات بصراحة — اللي كويس نقول كويس، واللي مش مستاهل نقول مش مستاهل.
- إضافات مجانية: إضافات ووردبريس عربية بنينا بيها الموقع ده نفسه، متاحة ببلاش.
- استشارات: لو محتاج حد يقعد معاك على مشروعك ساعة.
مين ورا عرب CMS؟
حسين شافعي، مطوّر واجهات وووردبريس من القاهرة. بيبني مواقع بـ JetEngine وElementor من سنين، وقرر يكتب اللي كان نفسه يلاقيه بالعربي وهو بيتعلم. المنصة دي شغل شخص واحد، فلو لقيت حاجة ناقصة أو غلط — ابعتلي.
الذكاء الاصطناعي في عرب CMS — بصراحة
المحتوى هنا مش بيتكتب لوحده، بس مش بيتكتب بإيد واحدة برضه. تعريب المقالات وتكييفها من مصادرها الإنجليزية بيتم بمساعدة Claude من Anthropic.
حتى الموقع ده نفسه: إضافات الأكاديمية والقاموس وكروت الدروس اتبنت بمساعدة Claude Code. ولو عايز تجرّب الأداة اللي بنشتغل بيها: جرّب Claude
الرأي والاختيار والمسؤولية عن اللي ينشر هنا تفضل مسؤوليتي أنا.
ليه «قطعة قطعة»؟
لأن الموقع الكويس مش بيتعمل مرة واحدة. بتحط قطعة، تشوفها شغالة، تحط اللي بعدها. وده بالظبط اللي هنعمله مع بعض.